الاثنين، 25 أغسطس، 2014

رباعيات صلاح جاهين - منتدي حكايه بنت


منتدي ادبي, منتدي حكايه, منتديات ادبيه, ادبي, ادبيه, رباعيات صلاح جاهين, عام, عامه

ولدى إليك بدل البالون ميت بالون
انفخ وطرقع فيه على كل لون
عساك تشوف بعنيك مصير الرجال
المنفوخين فى السترة والبنطلون
عجبى !!


خوض معركتها زى جدك ما خاض
صالب وقالب شفتك بامتعاض
هى كده .. ما تنولش منها الأمل
غير بعد صد ورد ووجاع مخاض
عجبى !!


كام اشتغلت يا نيل فى نحت الصخور
مليون بئونه وألف مليون هاتور
يا نيل أنا ابن حلال ومن خِِلفتك
وليه صعيبه علىّ بس الأمور
عجبى !!


منين أجيبها كلمه متألمة
لعبية فايره حايره ومصممة
منين أجيب كلمة تكون بنت أرض
تشفى اللى ما شفاهوش كلام السما
عجبى !!


أنا قلت كلمة وكان لها معنيين
كما بطن واحده وتوأمين زين وشين
لو دنيا شر .. التوأم الخير يموت
لو دنيا خير .. الشر ح يعيش منين ؟
عجبى !!


أنا اللى بالأمر المحال اغتوى
شفت القمر نطيت لفوق فى الهوا
طلته ما طلتوش إيه انا يهمنى
وليه .. ما دام بالنشوة قلبى ارتوى
عجبى !!


بره القزاز كان غيم وأمطار وبرق
ما يهمنيش ـ انا قلت ـ ولا عندى فرق
غيرت رأيى بعد ساعة زمان
وكنت فى الشارع .. وفى الجزمة خرق
عجبى !!


عينى رأت مولود على كتف أمه
يصرخ تهنن فيه يصرخ تضمه
يصرخ تقول يا بنى ما تنطق كلام
ده اللى ما يتكلمش يا كتر همه
عجبى !!


يا عندليب ما تخافش من غنوتك
قول شكوتك واحكى على بلوتك
الغنوه مش ح تموتك إنما
كتم الغنا هو اللى ح يموتك
عجبى !!


ياللى بتبحث عن إله تعبده
بحث الغريق عن أى شىء ينجده
الله جميل وعليم ورحمن رحيم
إحمل صفاته .. وانت راح توجده
عجبى !!


حقرا وفوق كوكب حقير محتقر
فى الكون تكون دنياكو إيه يا بقر
رملايه من صحرا ؟ .. لكين إيش تقول
والكون بحاله جوه عقل البشر
عجبى !!


لا تجبر الإنسان ولا تخيره
يكفيه ما فيه من عقل بيحيره
اللى النهارده بيطلبه ويشتهيه
هو اللى بكره ح يشتهى يغيره
عجبى !!


ياللى فى حماه الشمس تلقى الملاذ
وألف بكره وبكره .. فى ضلوعه لاذ
مين انت ؟ مارد ؟ رب ؟ قال لأ ده بس
انا اللى باروى القمح واسقى الفولاذ
عجبى !!


غسل المسيح قدمك يا حافى القدم
طوبى لمن كانوا عشانك خدم
صنعت لك نعليك أنا يا أخى
مستنى إيه .. ما تقوم تدوس العدم
عجبى !!


البط شال عدى الجبال والبحور
ياما نفسى اهج .. أحج ويا الطيور
أوصيك يا ربى لما اموت .. والنبى
ما تودنيش الجنة .. للجنة سور
عجبى !!


طال انتظارى للربيع يرجع
والجو يدفا والزهور تطلع
عاد الربيع عارم عرمرم شباب
إيه اللى خلانى ابتديت افزع ؟
عجبى !!


ولو انضنيت وفنيت وعمرى انفرط
مش عاوز الجأ للحلول الوسط
وكمان شطط وجنون مانيش عاوز
يا مين يقول لى الصح فين والغلط ؟
عجبى !!


عاد الربيع كأنه طعم الحب
والحب نار جوه العروق بتصب
اتمتع ازاى بيه وانا متقطع
من كتر خوفى لا فى الخطيئة يطب ؟
عجبى !!


ازاى شبابنا يقوم وياخد دوره
من غير صراخ يئذيه ويجرح زوره
يا هلترى أحسن له يقعد ساكت
أو يشترك ولو خرج عن طوره ؟
عجبى !!


عيني رأت عصفور ووياه ابنه
بيحدفه فى الريح وياخده فى حضنه
نوبتين وتالت نوبه ـ عجبى عليهم ـ
كانوا سوا بيرفرفوا ويغنوا
عجبى !!


أحسن مافيها العشق والمعشقة
وشويتين الضحك والتريقة
شفت الحياة ، لفيت ، لقيت الألذ
تغييرها ، وده يعنى التعب والشقا
عجبى !!


عجبى على العجب العجيب العجاب
لما الحقيقة تطل بعد احتجاب
وتروق وتحلا وفجأة تصبح مفيش
كمثل طراطيش بحر ياما خد وجاب
عجبى !!


فى الهوّ ماشى يا بهلوان إِش إش
يا فراشة منقوشة على كل وش
شقلبت عقلى وعقلى شقلبنى
وكنت باحسبنى بقيت ما اندهش
عجبى !!


وقفت ساعة الصبح باغسل سنانى
قالت لى شايف قوتى ولمعانى ؟
إيش تطلب اليوم منى ضحكة أسد ؟
والا ابتسامة اعلانات أمريكانى ؟
عجبى !!

الحلو يمّ اليمّ صابح رايح
سارح فى حضن الميه سابح سايح
الحلو داب فى البحر .. قلت أدوقه
وجدت لسه البحر برضك مالح
عجبى !!


يا كل كلمة للعجب فى قاموس
انسكلوبيديا لسان عرب أو لاروس
تعالوا نجدة .. ده لسه فى عصرنا
الشمس والبحر العريض بالفلوس
عجبى !!


الموج تلول تهبط وتطلع تلول
يا بحر خدنى الشط صاحبك ملول
والا بلاش الشط ح اعمل به ايه
ده ريحته طحلب مهرى وام الخلول
عجبى !!


عينى رأت مخلوق فى غاية البشاعة
أنا قلت له لما تأملته ساعة
اللذة والموت علموك اللّزَج
وانا علمونى الفلسفة والشجاعة
عجبى !!


غطس وقب الموج نهود بمبى
من ألف جيل جمالات ماتعلم بى
ياقلبى عيب دول أمهاتنا القدام
استغفر الله العظيم ربى
عجبى !!


علقت فى المسمار قناع مهزلة
ومعاه قناع مأساة بحزنه ابتلا
بصيت لقيتهم يشبهوا بعضهم
واهو ده العجب ياولاد .. وإلا فلا
عجبى !!


ظهر المسيح الحى على سفح ربوة
ونزل بهالة الضى وقعد فى قهوة
بُصوا تعالوا ، قالوا خليه فى حاله
الناس فى حالهم يابنى .. مالهمش دعوة
عجبى !!


لولا اختلاف الرأى يا محترم
لولا الزلطتين مالوقود انضرم
ولولا فرعين ليف سوا مخاليف
كان بينا حبل الود كيف اتبرم ؟
عجبى !!


يا وردة قلبى معاكى فى الريح لعب
لا تعبتى م الريح ولا قلبى تعب
احنا كده : نرتاح فى صخب الجنون
وفى السكون بنخاف قوى ونترعب
عجبى !!


ما أنتاش بتلعب ليه يا روح بابا ؟
ولا عسكرى ولا لص فى عصابة ؟
إلعب أسد أو ديب رهيب أو غزال
دى الدنيا فى نهاية المطاف غابة
عجبى !!


ورد ف ورق سلوفان يا حلوة اهديلك ؟
والا انقله بالطين فى شتلة واجيلك ؟
الأولانى لو وحا بحنانى
عجبى على التانى بإيه يوحيلك ؟
عجبى !!


أنا قلبى كوكب وانطلق فى المدار
حواليكى يا محبوبتى يا نور ونار
يلف مهما يلف ما بيكتفيش
وتملى نصه ليل ونصه نهار
عجبى !!

الأرض شوك أيوه لكين هايش
والحُمرة مش يعنى الطريق حايش
دى دمنا السيال وبُشرة خير
ان انتى عايشة .. وان أنا عايش
عجبى !!


إيه اللى خدته من مرور السنين
يا قلبى الا دمعتك والأنين
بتئن وبتفرح وترجع تحن
مع إن مش كل البشر فرحانين
عجبى !!


أوقات أفوق ويحل عنى غبايا
واشعر كأنى فهمت كل الخبايا
وافتح شفايفى عشان أقول الدرر
ما أقولش غير حبة غزل فى الصبايا
عجبى !!


مركب ورق من نفخة تتطوح
ركبتها والكل بيلوّح
سوّحت فيها اتنين وخمسين سنه
للآن .. ولا بتغرق ولا تروح
عجبى !!


ع الجسر فُتّ الصبح تحت الضباب
بين اللى لسه بينغرس واللى طاب
ما اهتز قلبى لنبت طالع جديد
قد اللى ماشى وتحت باطه الكتاب
عجبى !!


يا خالق الكون بالحساب والجبر
وخالقنى ماشى بلختيار والجبر
كل اللى حيلتى زمزمية أمل
وازاى تكفينى لباب القبر ؟
عجبى !!


قاعدة قنانى الخمر ساكتة وساهية
مع ابن آدم فى الشبه مُتناهية
مفيش كده روقان فى لحظة تشوفهم
وبعدها بلحظه يودوا فى داهية
عجبى !!


حتة محارة وجدتها فى يوم لقية
قالت لى شوف كيف الطبيعة شقية ؟
نظرت للكهف اللى فيها ولقيت
إن الطبيعة كمان .. لا أخلاقية
عجبى !!


بلياتشو قال إيه بس فايدة فنونى ؟
وتلات وقق مساحيق بيلونونى
والطبل والزمامير وكتر الجعير
إذا كان جنون زبونى زاد عن جنونى
عجبى !!


نقطة مرارة كمان على مشروبى
دّوبها يا ساقى حسب مطلوبى
طعم الحياة مش برضه فيها وفيها ؟
ليالى وردى .. ونهارات خرّوبى ؟
عجبى !!


وسط الحطام اتفرجوا يا أنام
تمثال ملك ومبْولة م الرخام
لتنين نحتهم نفس أسطى الحجر
وكانوا ذات يوم كتلتين لسه خام
عجبى !!


عيد والعيال اتنططوا ع القبور
لعبوا استغماية ولعبوا بابور
وبالونات ونايلونات شفتشى
والحزن ح يروح فين جنب السرور
عجبى !!


أنا قلبى كورة .. والفراودة أكم
ياما اتنطح وانشاط .. وياما اتعكم
واقول له كله ح ينتهى فى المعاد
يقول بساعتك ؟ والا ساعة الحكم ؟
عجبى !!


الضحك قال يا سم ع التكشير
أمشير وطوبة وانا ربيعى بشير
مطرح ما بظهر بانتصر ع العدم
انشالله أكون رسماية بالطباشير
عجبى !!


أهوى الهوى وهمس الهوى فى العيون
وبسمة المغرم ودمعه الحنون
وزلزلات الحب نهد الصبا
أكون انا المحبوب .. أو لا أكون
عجبى !!


يا ملونين البيض فى شم النسيم
لون الحنين والشوق وخمر النديم
ما تعرفوش سايق عليكو النبى
تلونوا الأيام بلون النعيم ؟
عجبى !!


الدنيا صندوق دنيا دور بعد دور
الدكة هى وهى كل الديكور
يمشى اللى شاف ويسيب لغيره مكان
كان عربجى أو كان امبراطور
عجبى !!


قطى العزيز راقد على الكنبات
فى نوم لذيذ .. وبيلحس الشنبات
وانا كل عين فنجان مدلدق قلق
صدق اللى قال إن الحياة منابات
عجبى !!


قالوا السياسة مهلكة بشكل عام
وبحورها يا بنى خشنة مش ريش نعام
غوص فيها تلقى الغرقانين كلهم
شايلين غنايم .. والخفيف اللى عام
عجبى !!


سلام سلام .. سلام سلام .. سلام
كلام كلام .. كلام كلام .. كلام
هز الورق يا صاحبى كدهوّه
يطلع كلام سلام .. وسلام كلام
عجبى !!


فوق تحت .. ورا قدام .. يمين شمال
فى الجو .. تحت الميه .. أو فى الرمال
طلب الكمال يحرم على الممكن
والممكنات دول محرومين م الكمال
عجبى !!


هات يا زمان .. وهات كمان يا زمان
غير بسمة الشجعان مامنى يبان
هو اللى داق الفرحة يوم ثورته
يقدر يعود ولا ثانية للأحزان
عجبى !!


عبثاً باقول واقرا فى سورة عبس
ماتلومش حد إن ابتسم أو عبس
فيه ناس تقول الهزل يطلع جد
وناس تقول الجد يطلع عبث
عجبى !!


يومى على الله تنتهى وتغيب
الشمس وتعود تانى يوم لهاليب
زى الحياة مأساه .. ومن كترها
بقى لا انتهاءها وابتداءها عجيب
عجبى !!


علم اللوع اضخم كتاب فى الأرض
بس اللى يغلط فيه يجيبه الأرض
أما الصراحة فأمرها ساهل
لكن لا تجلب مال ولا تصون عرض
عجبى !!


انا كانلى أب وكان رئيس محكمة
ستين سنة فى قضية واحدة اترمى
ستين سنة وطلع براءة وخرج
يشكى الحياة والموت لرب السما
عجبى !!


قالوا ابن آدم روح وبدنه كفن
قالوا لأ بدن قالوا لأ ده روح فى بدن
رفرف فؤادى مع الرايات فى الهوا
أنا قلت لأ روح فى بدن فى وطن
عجبى !!

0 التعليقات:

إرسال تعليق